Velkomin á matarvefinn fræ.com. Ég heiti Arna Engilbertsdóttir og opnaði fræ 1. janúar 2021 í þeim tilgangi að skapa vettvang fyrir náttúrulegan lífsstíl án dýraafurða. Fræ leggur ríka áherslu á gæði hráefna og heildræna matargerð þar sem grænmeti, ávextir, baunir, heilkorn og fræ eru í aðalhlutverki. Markmið fræ er að vekja jákvæða forvitni lesenda um náttúrulegri leiðir til að næra líkamann og mátt plönturíkisins.

Það voru alvarleg veikindi í æsku sem gáfu mér einstaka virðingu fyrir líkamanum mínum, bæði af nauðsyn og áhuga. Líkaminn er svakalega sterkur á sama tíma og hann er berskjaldaður fyrir utanaðkomandi aðstæðum, þar á meðal því sem við setjum ofan í hann. Þegar ég byrjaði að borða í takt við innsæið mitt og fókusa á heila plöntumiðaða fæðu með unna matvöru og óskiljanleg aukaefni í algjöru lágmarki lifnaði líkaminn minn einfaldlega við. Þó að margir ómissandi þættir komi að heilbrigðum lífsstíl var mataræði sá þáttur sem ég gat tileinkað mér áreynslulaust og í dag hef ég borðað plöntumiðað í u.þ.b. 10 ár.

Árið 2024 kom matreiðslubókin Fræ út og hefur hún að geyma rúmlega hundrað fjölbreyttar uppskriftir að gómsætum réttum úr plönturíkinu. Uppskriftirnar á síðum bókarinnar eiga það sameiginlegt að vera litríkar og bragðmiklar og það er á allra færi að reiða þær fram. Bókin er gefin út af Sölku til sölu í öllum helstu bókaverslunum, Kokku og á vef Sölku.

Fræ er fyrir alla sem langar að gera vel við sig í eldhúsinu og það er mín von að þú njótir þess að sækja þér innblástur hér - það er líka best í heimi að borða góðan mat!

Endilega hafið samband hér eða á instagram varðandi matarstíliseringar fyrir auglýsingar og herferðir, uppskriftir eða samstörf.